سؤال يطرحه الكثير وهذه هي الإجابة !! 
😳
السؤال / معقولة بخمسين مليون دينار نحل جزء كبير من مشكلة ماء البصرة ؟ معقولة ..، معقولة ....
اَي معقولة تدون ليش خليكم وياي بس خلونه نفرض جدلا الآتي:
انه المرجعية ودت عليه بسكته وكالتلي هاي خمسين مليون حقوق شرعية وروح انت وجماعة مهندسين وفنيين وياك وحلو الي تكدرونه من مشكلة ماء البصرة بدون ما تذكرون انه أنتم من طرفنا شوفوا هسة شراح يصير وياي
اولا نجي لمحافظ البصرة ونطلب اللقاء بيه الله يحبنا اذا التقينا بيه بنفس اليوم راح انكلة احنا متطوعين ولدينا بعض المال لمعالجة مشكلة الماء نفترض انه المحافظ حريص فراح يهمش على طلبنا مشكورا: الى مدير ماء البصرة لإجراء اللازم بالسرعة الممكنة وإعلامنا
نروح الى مدير الماء اذا التقينا بيه خير وبركة بنفس اليوم اذا ما يطلع يدرس قانون مسائي وعنده امتحان دور ثاني ومثول الدوام
كولوا التقينا بيه راح يفر بإذنه ما عنده مخرج قانوني راح يكول النا شلون اتعامل وياكم لا أنتم جه حكومية ولا منظمة يعني تعتبرون جهة مجهولة يراد اكتب لمراجعي بهذا الصدد
كولوا سوينا اتصال وي المحافظ والمحافظ اجتمع بيه ولتجاوز عقبة تعريفنا كجهة كولوا المحافظ شافلنا من هاي منظمات المجتمع المدني الفاهية وكال تعاملوا باسمهم كونهم جهة معرفة بالمحافظة ( بالمناسبة المحافظ اذا سوه هيج شغل يعتبر ملاك مو محافظ والله يدينه ويحفظه خيمة فوك روسنه )
طبعا مدير الماء يحتاج بعد هذا الإجراء يكتب للوزارة مالته وخل نفترض انه ابو البريد ثاني طلع للوزارة لإعلامها هاي اذا كلنا ان هناك فك ارتباط معمول بيه واقعا واذا لا يحتاج موافقة الوزارة لغرض التعامل مع منظمتنا التي التحقنا بها بدون رغبة منا واذا هيج جيب ليل وأخذ عتاب على ما تطلع موافقة الوزارة
كولوا تمت او ما يحتاج موافقة الوزارة ...
هسة نريد نبلش بالشغل ( لا حظوا هسة الجميع ينظرنا كجهة مانحة عدها فلوس وَيَا محلى قطها خصوصا هاي السنين لا مقاولين ولا مقاولات يعني يحتاج نصرف على الجميع لغرض مساعدتنا خو ابو الكرين مال الدولة شغلة ويانه يصير بالساعات
زين شخصنا المضخات العاطلة ونريد نستبدلهن لازم نشتري كولو اشترينا المضخات هسه غير انشدهن
لا
مانكدر نشدهن لازم نسويلهن ادخال مخزني هاي سياقات خو ما نكسر ركبة المدير والمسؤولين
هسة لازم اندخلهن للمخزن نكدر ندخلهن
لا
ابو المخزن يكول لازم تتشكل لجنة فحص واستلام وتفحصهن وتوقع على الإدخال المخزني
خوش تشكلت اللجنة راح توقع ؟
لا
اللجنة تريد شهادة منشأ
كولوا جبنه الشهادة حتى لو تزوير (وهاي مايرضه بيها السيد السيستاني بس مراح نكله بيها )دخلن هسة لازم ناخذهن نكدر
لا
لازم مستند صرف مواد مخزنية موقع من لجنة طويلة عريضة ( خلو في بالكم اذا الكتب لوحدها تمشي تطول السالفة يعني انا وجماعتي نفتر بهاي الدوامة )
طبعا ابو المخزن يشرط بالضميمة علينا إرجاع المواد المستهلكة هسة هاي سهلة نجند جماعة من الفريق الها
كولو طلعناها من المخزن ونصبنا المضخات واشتغلت يابة يلفنيين يلمهندسين شبكة الأنابيب شلونها
اجانه الجواب ..... oooook
بس مجرد ان شغلنا المضخات شو كلساع يصير تكسر بالأنابيب لانها متهرئة وفيها تجاوزات غير نظامية
طبعا اكو جم واحد من الموظفين ما دايرين بالنا عليهم العزيز رأسا كتب للنزاهة التالي :
ان هذا المشروع غير خاضع لضوابط احالة المشاريع الامر الذي أدى الى أضرار كبير بممتلكات الدولة ... وآخر شيء يوقع باسم الصالح العام
واويلي اذا هذا المخبر يعرف انه احنا زورنا شهادة المنشأ ... يابوية
لا تكلي ولا اكلك النزاهة سوت استقدام انا وجم مهندس من الدائرة وإحالة الامر الى قاضي النزاهة
طبعا القاضي يشوف كدامة أوراق فيريد يأدب هؤلاء السراق المستهترين الذين أمامه
انا عود مسيطر بعد ياروح ما بعدج روح
سيادة القاضي تره انا مكلف من السيد السيستاني
القاضي: ها ها ها عيدها بلله ولكم أنتم ما شبعتوا بوك رجعتوا للسيد تريدون تشوهون سمعته الله يطيح حظكم ...... اخذوهمممممممم
كابوس
الحمد لله انه هذا الكلام كله افتراضي
والي قام بالمهمة السيد الصافي
الشاهد اغلب مشاكلنا ربما تكون بسيط حلها ولكن نظامنا الاداري والرقابي يجعلها عويصة جدا
وسلامتكم
https://telegram.me/buratha
