الباحث والاعلامي : قاسم بلشان التميمي
(يابه ليش ما دكول السلام عليكم) هذه الجملة وجهها سائق الكوستر فرحان الغضبان لأحد الركاب عندما (صعد) في الكوستر ولم يسلم ، فقال له الراكب ( عمي فرحان الغضبان تدري اني ليش ما سلمت ، لأنه ولسبب بسيط جدا ان الانسانية عندما تتقدم تكون الامور بالمكلوبي يعني الامور اصير مقلوبة ) ، فرد عليه فرحان الغضبان قائلا ( هاي شنو السالفة الجديدة ، شنو السلام بالمكلوبي وشنو الانسانية تتقدم ) ، وأضاف فرحان الغضبان ( عمي صدك جذب تره هاي ما صايرة ولادايرة) ، فقالت أمرأة من العبرية أسمها أم جبار ( خالة فرحان خل نشوف الاستاذ شنو قصده خلي يكمل ) ، فرد عليها فرحان الغضبان ( يا معودة ام جبار يرحم والد والديج شنو يكمل ) ، واضاف الغضبان ( خوش قصة هاي تقدم الانسانية !!) ، فقال له الراكب ( عمي فرحان مختصر مفيد الانسانية بعد كم سنة من تتقدم تصير الامور عكس ما عليها الان ) ، فقال فرحان الغضبان ( يعني شلون ، شو اني كل شي ما دا افتهم ) فقال له الراكب ( حشاك عمي فرحان انت ابو الفهم ، بس اني اريد اكول فد شي ، وهو ان الانسانية بعد الاف السنين تتقدم وعلى سبيل المثال ، من تروح للمطعم انت تحضر الاكل لعمال المطعم ، ومن تروح للملعب تريد تشوف لعبة مال طوبة الجمهور يلعبون طوبة على المدرجات واللاعبين يوكفون بنص الساحة بس يباوعون الى ان تنتهي اللعبة و) ، فقال له فرحان الغضبان (عمي كافي كافي انت شنو دا تحجي شنو الجمهور يلعب طوبة يعني على الحجي مالتك بعد ماكو لا مسي ولا رونالدو ) ، فضحك الراكب وقال ( عمي فرحان انت ملكي لو كتلوني) ، فقال له فرحان الغضبان ( عمي عوف الطوبة بس اريد أسألك سؤال وهو على الحجي مالتك بعد اني ما اسوق الكوستر اكعد والعبرية يسوقون لكن راح تصير عركة على الستيرن مال السيارة لأن الكل يريد يسوق ويقود الكوستر !!) وهنا تدخلت ام جبار وقالت ( يا عزا العزاني اني ما اعرف اسوق ) ، فرد فرحان الغضبان وقال بعد ان ضحك ضحكة عميقة من قلبه ( يابه اذا السالفة مثل ما يكول الاستاذ لعد احنه متقدمين الاف السنين على العالم ، لان والحمد لله كل امورنا مكلوبي ولحد الان العركة مستمرة على السياقة والكل يريد يصير سايق وقائد للوطن اقصد الكوستر ) وانتهت الحلقة بدموع فرحان الغضبان على بقية دول العالم لأنها متأخرة عنا الاف السنين واموره مو مثل امورنا متقدمة بالمكلوبي!! .
https://telegram.me/buratha
