الباحث والاعلامي : قاسم بلشان التميمي
فرحان الغضبان سائق الكوستر يعود الى جمهوره( الركاب) بعد غياب عدة أيام ، وبعد عودته الميمونة ،قالت الحاجة ( أم ستار) الحمد لله على السلامة يمه فرحان شو ماكو ، فقال لها فرحان الغضبان (والله يايمه جان عندي مراجعات بالمحكمة) ،فقالت له ام ستار يا حافظ خير اكو شي ؟ فقال لها فرحان الغضبان ( والله يا ام ستار رحت شاهد ويا جارنا ابو حقي حتى أشهد يم المحكمة ان ابنه حقي خوش ولد ومو حرامي ) ، وهنا تدخل رجل في الستين من عمره وقال عمي فرحان شنو السالفة احجي ؟ خل نفتهم ! ، فقال فرحان الغضبان ( والله يا جماعة الشرطة لزمت حقي ابن جاري وتم اتهامه بسرقة دجاجة !!) ، فقال جميع العبرية شنو ؟ ، فقال فرحان الغضبان ( مثل ما سمعتم الشرطة أتهمت حقي انه سارق دجاجة ) ، وهنا قالت ام ستار ( زين الدجاجة تبيض ما تبيض ؟) ، فقال لها فرحان الغضبان ( اي يابه الدجاجة تبيض ) ، واكمل فرحان الغضبان كلامه ( لكن القاضي طلع ابن اوادم وحكم على حقي سجن ثلاث سنوات بس !!) ، فقال أحد ركاب العبرية ( على مود دجاجة يحكم القاضي بسجن حقي ثلاث سنوات ودكول يا فرحان ان القاضي ابن اوادم ) ، فرد عليه فرحان الغضبان بالقول ( اي عمي القاضي ابن اوادم لأن حكم بدون دليل !) ، وهنا قال جميع ركاب العبرية ( شو احنه كل شي ما دا نفتهم من كلامك يا فرحان !!) ، فقال لهم فرحان الغضبان ( عمي لو الدجاجة تبيض بيض مال ذهب واكو دليل على السرقة جان حقي طلع براءة !!) ، وهنا قالت ام ستار (يعني قصدك مثل جماعتنا اليبوكون البيض الذهب واكو دليل وأدلة قاطعة عليهم لكن محد يحاجيهم ويسجنهم !!) ، فرد عليها فرحان الغضبان بالقول ( عيوني ام ستار هسه اني جبت طاري الجماعة ، عمي جفيني شرج وأنزلي وصلت الى نهاية الخط) ، وانتهت الحلقة على امل ان يسجن حرامي بيض الذهب علما انه يوجد الف دليل ودليل ووثيقة تثبت انه حرامي ، وردد فرحان الغضبان مع نفسه ( كم سنة يسجن من يسرق وطن ؟ ويسرق بيض الذهب خصوصا بيض الذهب الاسود مال حقي وجماعته المساكين !).
https://telegram.me/buratha
