د. حسين القاصد ||
من المضكورات في الكتب سالفة ( كار) وگبل الوادم إذا شافت واحد يشتغل شغلة موش زينة ويحاولون يقللون من شأنه.. يگولون هذا كار مو عار..
واكو ناس يسمونهم أهل كار.. واذا واحد أغم يسمونه عار اخوته.. بس ماكو كار اخوته..
هاي گبل.. هسة كلشي أكو .. ما علينا بالوادم.. الأجانب يسمون السيارة كار ( Car) وهاي السالفة تضكرنه بسيارة ابو فرحان اللي ياهو يجي يركبها..
ويومية مضروبة من صفحة وتخرخر ومسكربة ..
هم ماعلينا بالوادم.. الظاهر العراقيين اشتقوا من (كار) سالفة الكروة.. وصار الزمال يموت بكروته.. هم زين.. اكو ناس تموت حتى بدون كروة ..
هم ما علينا بالوادم..
يگولون صرح مصدر مسؤول رفض الكشف عن اسمه خاف يجيسه برد.. أو احتمال يستحي.. صرح هذا المصدر بأن شركة اسمها كار اشترت محطتين كهرباء في البصرة..
وهاي المحطتين من أملاك الشعب يعني مو مال ابو واحد ولا اخو واحد.. بس هاي شركة كار اشترتهم.. فوگ نفط البصرة انوب ممتلكاتها..
هسة شنهي بوية هذا كار لو عار؟
https://telegram.me/buratha
