قصيدة فرحة واشتياق

بمناسبة الذكرى العطرة لـ 15 شعبان خير ايام الله بعد ليلة القدر بقلم _ عـــــــدي النعماني

 القصيدة من مقطعيين  المقطع الاول بعنوان فــــرحة يوم 15 شعبان فرحت كل زوايا الكَاع ونورت كل ليالينه . كل الناس مبتهجه وصدى الضحكات عله شفاف الدهر عيد يانادينه . بكَبرها فاطمة الزهره مبتشرة وتكَول اليوم رجعت فدك بيدينه . العيون الطفت ردت تضوي من جديد والجفوف بطرب صاحت تحَنينه. حته الذيب حارس صار للنعجات وغَير طبعه شوك الجول وصارت لمسته حنينه. كَطرات النده باستها للوردات والنجمات لمعن والكَمر كامل يضوينه . وسعفات النخل ركَصت وناسه وكيف وعثوك الرطب غنت لاغانينه . والشاطي حضن روجاته لهفه وشوك وزهت جنها بعرس خضره روابينه . والزهرات كلهه فتحَت والطير رفرف فوك فوك لفوك بكل قوة جناحينه . يزف بشارة للدنيا يكَوللها انولد مهدينه . انولد خير البرية اليوم ابن حيدر علي الكرار والينه..._____________________________________

 

المقطع الثاني _ اشتياق احنه لساع منتظريين بلهفة ياامام الكون غيابك طول علينه .نطرناك احدعش ميه ونظل ننطر لمَا تجينه .العمر شنهو العمر لوما املنا بيك الك كل العمر بيامه وسنينه . بس النا عتب ياسيدي وياك شوكت تظهر وتسَكت الشمتو بينه.تره الفكر الحاربه جدك ابو الحسنين باقي اليوم بنفس شكله وعناوينه .ولملوم السقيفة اللي نفثت سمهه لحد الان متربص يعادينه .والسيوف اللي ذبَحت جدك صريع الطف بهذا الوكت مسلوله وتتانينه .تتناني غفلة من عدنا حتى بفرح تذبحنا وتدمينه .ياخير الزلم يحزام كل مظلوم يانبع العلم يافارس الزينه .دظهر والنبي عيسى عله يمناك تكطع كل لسان اعوج يحاجينه .اكطع كل ركَاب الخانت المختار الما سمعت وصيته وبدلت دينه .واتبعت اصوات الحقد والطغيان وعافت زينه وجلبت بالشينه .عجل يابعد روحي تره ضاكَت علينه الكاع وشمكثر اعادينا ...