ابطال العراق

( قصيدة للشاعر : ابو رضا السماوي )

 رد يعايل عايلك لا تستهين       ********      وخل تهزك عالعراق العاطفة

 عدنه شبان التهد حتى الجبال    ********      وكالت على العال اعله حده نوكفه

 ماتطخ اجبين تعشك للجهاد       ********      وخبر ذلتهه اجه مخبر نفه

 رسمت ابدم النحر حد العراق     ********      وهبت ابوجه اليضد كالعاصفه

 رضعت البارود وي كطر الحليب ********      وصار يتضهضب عرجهه اعله الوفه

 كالت انكص الجفوف الما تذود         *********        او وثبت الهالموزمه ومتراصفه

خذت من عاشور ثورة بن لقين         *********         وعدهه جرح الموت لحظات العفه

شمّت اتراب الوطن كالت حياة           *********         ولاحياة ابلا كرامة ومنصفه

روّت الجبد العطش من الفرات          **********        ولازم اترد الجميل الموقفه

فرشت الغيرة وتكبّر للصلاة              **********        وسجدت اعلة المفخرة ومتحلّفه

ابد ما كزبر جلدهه وما تخاف           **********        وياعراقي انته اسمعت ذل طارفه

مالواهه الضيم بملاوة الجفوف        ***********       والهه راية اعله المعالي امرفرفة

تخفج وعنوانها النصر لنـــــــــا        ***********       وعدهه طبع المرجلة اول صفة

عدنه شبان التهد حتى الجبال           ***********       وكالت العال اعله حده انوكفه

          قصيدة للشاعر :  ابو رضا السماوي